Romans 10

Israel tatame rem God reri wule yenbo be sanetene.

1Ari naregesi, an wuribaike kenakem habobo. God re Israel tatame remne sene potte, an etop selbo. Opkap an God rene tewok tewok etop wemetbo. 2An op sanetene, Israel tatame rem God reri wule yenbo nente pap tetebo. Rem God reri wule welepe be mettene, eker rem welepe be nenbo. 3God re tatame remne tatame yenbo webo wule rem welepe be sanebo. Eker rem remri wuribaike habobo wule etopwou nenbo. Opkap rem God re remne tatame yenbo webo wule kulke be tetane. 4Krais eterke Moses Reri Wule et legem. Tatame rem Krais rene omuteke habote, God re remne op wete. Kem areri tatame yenbo.

5Moses Reri Wule sen God re remne tatame yenbo webo tuma, Moses re op basrasem.

Juda etemri wule tatame rem heyarwai sete,
rem heyarwai sete,
rem yaper wos be wuri nente,
rem heyar somsom temente.
(Lo 18:5)

6Omuteke habon God re tatame yenbo webo tumak God Reri Siglow tuma op webo.

Kem kworer mane op wemette.
Yike Hevenke yaute? (Tuma tobo gwor.
Yike Hevenke yawun Krais rene panen yerte?)
7Kem mane op habote.
Yike gambo kwomke warte?
Tuma tobo gwor.
Yike gambo kwomke waren yin Krais rene panen wayete?
Yike nemne God Reri Tuma wesowte?
8Omuteke habobo wule op webo.

God Reri Tuma et kemne meknik tetane.
Et keremri gwusi taulek tetane.
Et keremri wuribaike tetane.
(Lo 30:11-14)

Er omuteke habobo wuleri tuma nem kemne op wesowbo. 9Kem kemri tumaske op wete. Jisas re Haneyen. Kem keremri wuribaike omuteke op habote. Jisas re sam, God re rene sele meike nenewayen wow sene newom. Kem etop wete, etop omuteke habote, God re kemne poten reri kwomke panen yite, kem pow tete tetane. 10Tatame rem remri wuribaike omuteke habobo, God re remne op webo. Kem ari tatame yenbo. Tatame rem op webo. Jisas re Haneyen. Op webo tatame remne God re poten reri kwomke panen yite, rem pow tete tetane.

11God Reri Siglow tuma op webo.

Aboi tatame rem Jisas rene omuteke habote,
rem pap yaper be tete.
(Aisaia 28:16)

12Er tuma et Juda tatamekene Juda bo tatamekene remne kirkir webo. God re remne kena kena be nenbo. Haneyen re aboyei tatame etemri Haneyen. Rekene namrete tatame remne re heyarsubu nenbo. 13God Reri Siglow tuma op webo.

Aboi tatame rem Haneyen Jisas rene op wete.
Haneyen, ne anne kwobo late.
Op wemetbo tatame, God re remne poten reri
kwomke panen yite, rem pow tete tetane.
(Joel 2:32)

14Kem op habote. Jisas rene omuteke be habobo tatame rem Jisas rene mapurke wemette, re remne kwobo late? Jisas rene be sanetene tatame rem rene mapurke omuteke habote? God Reri Tuma remne be wesowtene, rem mapurke mette? 15God Reri Tuma wesow tame remne be weraste, rem mapurke yin tuma wesowte? God Reri Siglow tuma op webo.

Tuma Yenbo wesowbo tame rem nemne lasyabo,
et yenbosubuwai.
(Aisaia 52:7)

Israel rem God Reri Tuma Yenbo be potem.

16Aboi tatame rem God Reri Tuma Yenbo omuteke be metem. Aisaia re etop habon op wem.

Haneyen, nemri wesowbem tuma yike
tatame rem omuteke habobo?
(Aisaia 53:1)

17Opkap tetane. Tatame rem Krais reri sig wesowbo tame remri tuma metbo, sene rem Krais rene omuteke habobo.

18An wemetbo. Tatame rem God Reri Tuma metem o rem be metem? Ekeya, rem metem. God Reri Siglow tuma op webo.

Tuma wesow tame remri tuma wuskiy kwomke kwomke yim.
Remri tuma gene genewaike yim.
(Buk Song 19:4)

19An sene wemetbo. Kap, Israel tatame rem er tuma tobo heyar be metem? Yehow. Rem tuma tobo op metem. Rem omuteke be habote, God re agerbo tatame remne poten rem reri tatame tem. Israel rem etop mettene. Kiyi Moses re God reri wem tuma op wem.

An sigkene bo tame beig
remne potte, rem ari
tatame tete tetane.
Israel tatame rem etop
late, rem wuribai yaper
tete tetane.
Purerekene bo tatame an
remne heyar nente
tetane.
Israel rem etop late, rem
pap yokte tetane.
(Lo 32:21)

20Aisaia re mol pan God reri wem tuma op wem.

Anne be sopbo tame rem anne lam.
Anne be we sopbo tame an remne op wem.
An gwok tegek tetane.
(Aisaia 65:1)

God re Israel remne op wem.

Kwokwos kwokwos an wan be metbo tatame,
mangure tebo tatame remne nar poten kowtene.
21(Aisaia 65:2)